ورلڈ الیون کے کھلاڑیوں کے ناموں کا اعلان ہوتےہی پاک فوج بھی میدان میں آگئی

اسلام آباد (مانیٹرنگ ڈیسک )پاکستان کے دورے پر آنیوالی ورلڈ الیون کی ٹیم میں شامل بین الاقوامی کرکٹ کھلاڑیوں کے نام سامنے آگئے، پاک فوج کی جانب سے دورہ پاکستان کا خیر مقدم۔ تفصیلات کے مطابق چیئر مین پی سی بی نجم سیٹھی نے کھلاڑیوں کے ناموں کااعلان کرتے ہوئے بتا یا کہ سریز کھیلنے کے لیے 7ممالک کے 14کھلاڑی پاکستان آرہے ہیں جن میں سے 5جنوبی افریقہ ،2ویسٹ انڈیز اور 3آسٹریلیا کے کھلاڑی شامل ہیں ۔انہوں نے کہا کہ ورلڈ الیون کی کپتانی فاف ڈوپلیسی کریں گے جبکہ ٹیم میں ہاشم آملہ ،گرانٹ ایلیٹ ،سموئیل بدری ،ڈیوڈ ملر ،عمران

طاہر ،ڈیرن سیمی ،پال کولنگ ووڈ ،مورنی مورکل ،جارج بیلی ،تمیم اقبال ،ٹم پیشن ،بیٹن کٹنگ ،تھیسرا پریرا کے نام شامل ہیں ۔نجم سیٹھی نے بتا یا کہ پاکستان اور ورلڈ الیون کے درمیان سریز میں تین میچز کھیلے جائیں گے ۔ ورلڈ الیون کی ٹیم پاکستان آنے سے پہلے دو دن دبئی میں نیٹ پریکٹس کرے گی اور ورلڈ الیون کے ہیڈ کوچ اینڈی فلاور ہو نگے ۔دریں اثنا سماجی رابطوں کی ویب سائٹ ٹوئٹر پر ٹوئٹ کرتے ہوئے پاک فوج کے شعبہ تعلقات عامہ(آئی ایس پی آر ) کے سربراہ میجر جنرل آصف غفور کا کہنا تھا کہ پاکستانی امن پسند اور کھیلوں سے محبت کرنے والی قوم ہیں۔ورلڈ الیون کے کھلاڑیوں کو پاکستان کی سرزمین پر خوش آمد ید کہتے ہیں۔ساری قوم ورلڈ الیون کی میزبانی کے لئے بے تاب ہے۔انہوں نے اپنے ٹوئٹ میں پی ایس ایل فائنل کی تصاویر بھی اپ لوڈ کی ہیں جن میں شائقین نے ’’آج پاکستان جیت گیا ہے‘‘ کے سلوگن والے پوسٹر اٹھا رکھے ہیں۔